ഏറെക്കാലത്തെ ഇടവേളയ്ക്ക് ശേഷം 100സിസി സെഗ്മെന്റിലേക്ക് ജനപ്രിയ ഇരുചക്ര വാഹന ബ്രന്‍ഡായ ഹീറോ മോട്ടോകോര്‍പ്പ് തങ്ങളുടെ ജനപ്രിയ ബൈക്കായ പാഷന്‍ പ്ലസ് പുതിയ രൂപത്തില്‍ അവതരിപ്പിച്ചു. ഏകദേശം മൂന്നു വര്‍ഷത്തിന് ശേഷമാണ് പാഷന്‍ പ്ലസ് ഇന്ത്യയില്‍ തിരിച്ചെത്തിയത്. 2020 ന്റെ തുടക്കത്തില്‍, BS6 മലിനീകരണ മാനദണ്ഡങ്ങള്‍ പാലിക്കാന്‍ കഴിയാത്തതിനാല്‍ കമ്പനി പാഷന്‍ പ്ലസിന്റെ ഉല്‍പ്പാദനം നിര്‍ത്തുകയായിരുന്നു. ബിഎസ് 6 ഫേസ്-2 മാനദണ്ഡങ്ങള്‍ക്കനുസൃതമായി കമ്പനി ഇപ്പോള്‍ പാഷന്‍ പ്ലസില്‍ പുതുക്കിയ എഞ്ചിന്‍ നല്‍കിയിട്ടുണ്ട്. ബൈക്ക് ഇനി E-20 പെട്രോളിലും പ്രവര്‍ത്തിക്കും. പുതിയ ഹീറോ പാഷന്‍ പ്ലസിന്റെ ദില്ലി എക്സ് ഷോറൂം വില 75,131 രൂപയാണ്.
പുതിയ ഹീറോ പാഷന്‍ പ്ലസ് 97.2 സിസി, സിംഗിള്‍ സിലിണ്ടര്‍, എയര്‍ കൂള്‍ഡ്, ഫ്യുവല്‍ ഇഞ്ചക്റ്റഡ് എഞ്ചിന്‍, 4 സ്പീഡ് മാനുവല്‍ ഗിയര്‍ബോക്സ് ഉപയോഗിച്ച് ട്യൂണ്‍ ചെയ്തിരിക്കുന്നു. ഈ എഞ്ചിന്‍ 7.9 bhp കരുത്തും 8.05 Nm ടോര്‍ക്കും ഉത്പാദിപ്പിക്കുന്നു. ബിഎസ്6 ഘട്ടം 2 മാനദണ്ഡങ്ങള്‍ക്ക് അനുസൃതമായാണ് എഞ്ചിന്‍ നിര്‍മ്മിച്ചിരിക്കുന്നത്. ഇതിന് E20 ഇന്ധനത്തിലും പ്രവര്‍ത്തിക്കാന്‍ കഴിയും. എഞ്ചിന്‍ ന്യൂട്രല്‍ ഗിയറില്‍ ആയിരിക്കുമ്പോള്‍ കുറച്ച് നിമിഷങ്ങള്‍ക്ക് ശേഷം എഞ്ചിന്‍ കട്ട് ചെയ്യുന്ന i3s സാങ്കേതികവിദ്യ പോലുള്ള സവിശേഷതകളുമായാണ് മോട്ടോര്‍സൈക്കിള്‍ ഇപ്പോള്‍ വരുന്നത്. റൈഡര്‍ ക്ലച്ചില്‍ അമര്‍ത്തുമ്പോള്‍ തന്നെ എഞ്ചിന്‍ സജീവമാകും. മൊബൈല്‍ ഉപകരണങ്ങള്‍ ചാര്‍ജ് ചെയ്യുന്നതിനായി ഒരു സൈഡ് സ്റ്റാന്‍ഡ് ഇന്‍ഡിക്കേറ്ററും ഇടത് ഹാന്‍ഡില്‍ബാറില്‍ യുഎസ്ബി പോര്‍ട്ടും ഉണ്ട്. ഇത് കൂടാതെ, ഡിജിറ്റല്‍ അനലോഗ് ഇന്‍സ്ട്രുമെന്റ് ക്ലസ്റ്ററും ഉണ്ട്. ഫ്യുവല്‍ ഗേജും ട്രിപ്പ് മീറ്ററുകളും ഡിജിറ്റല്‍ ലേഔട്ടില്‍ കാണിക്കുമ്പോള്‍ സ്പീഡോമീറ്റര്‍ ഒരു അനലോഗ് യൂണിറ്റാണ്.
ഹീറോ പാഷന്‍ പ്ലസിന്റെ രൂപകല്‍പ്പനയില്‍ ഒരു മാറ്റവും വരുത്തിയിട്ടില്ല. എന്നാല്‍ ബോഡി പാനലുകളില്‍ ചില പുതിയ ഗ്രാഫിക്‌സ് ലഭ്യമാണ്. മൂന്ന് നിറങ്ങളിലാണ് (ഷേഡ്സ് സ്പോര്‍ട്സ് റെഡ്, ബ്ലാക്ക് നെക്സസ് ബ്ലൂ, ബ്ലാക്ക് ഹെവി ഗ്രേ) ബൈക്കിനെ കമ്പനി അവതരിപ്പിച്ചിരിക്കുന്നത്. കംഫര്‍ട്ട് ഫീച്ചറുകളെക്കുറിച്ച് പറയുമ്പോള്‍, ടെലിസ്‌കോപ്പിക് ഫ്രണ്ട് ഫോര്‍ക്കുകളും പിന്നില്‍ ഡ്യുവല്‍ സ്പ്രിംഗ്-ലോഡഡ് ഷോക്ക് അബ്‌സോര്‍ബറുകളും നല്‍കിയിട്ടുണ്ട്. ഇതിന് പുറമെ ഐബിഎസോടു കൂടിയ ഡ്രം ബ്രേക്കിംഗ് സംവിധാനവും ബൈക്കില്‍ നല്‍കിയിട്ടുണ്ട്.
അളവുകളുടെ കാര്യത്തില്‍, പാഷന്‍ പ്ലസ് 1,982 എംഎം നീളവും 1,087 എംഎം ഉയരവും 770 എംഎം വീതിയും ലഭിക്കുന്നു. സീറ്റിന് 790 എംഎം ഉയരം ലഭിക്കുമ്പോള്‍ ഗ്രൗണ്ട് ക്ലിയറന്‍സ് 168 എംഎം ആണ്. മോട്ടോര്‍സൈക്കിളിന് 115 കിലോഗ്രാം ഭാരം ഉണ്ട്, ഇന്ധന ടാങ്കിന് 11 ലിറ്റര്‍ ശേഷിയുണ്ട്. ഹോണ്ട ഷൈനിനും ബജാജ് പ്ലാറ്റിനയ്ക്കും എതിരെയാണ് ഹീറോ പാഷന്‍ പ്ലസ് മത്സരിക്കുന്നത്.
