ദില്ലി: ഡിജിറ്റല്, സാങ്കേതിക സര്വകലാശാല വിസി നിയമനവുമായി ബന്ധപ്പെട്ട് റിട്ട. ജഡ്ജി സുധാന്ഷു ധൂലിയയെ സെര്ച്ച് കമ്മറ്റി ചെയര്പേഴ്സണാക്കി ഉത്തരവിട്ട് സുപ്രീം കോടതി. ജഡ്ജിയെ സെര്ച്ച് കമ്മിറ്റിയുടെ ചെയര്പേഴ്സണ് ആക്കണമെന്ന് കേരളം കോടതിയില് ആവശ്യപ്പെട്ടിരുന്നു. നിലവില് കേരളത്തിന്റെ ആവശ്യം കോടതി അംഗീകരിച്ചിരിക്കുകയാണ്. സ്ഥിരം വിസി നിയമനത്തിന് സംസ്ഥാനവും ഗവര്ണറും നല്കിയ പട്ടികയുടെ അടിസ്ഥാനത്തില് കമ്മറ്റി രൂപീകരിക്കുമെന്നും രണ്ടുപേര് ചാന്സിലറുടെ നോമിനി, രണ്ടുപേര് സംസ്ഥാനത്തിന്റെ നോമിനി എന്ന നിലയില് സെര്ച്ച് കമ്മിറ്റി രൂപീകരിക്കുമെന്നും കോടതി വ്യക്തമാക്കി. രണ്ടാഴ്ചക്കുള്ളില് സമിതി രൂപീകരിക്കണം. ഒരു മാസത്തിനുള്ളില് നടപടികളില് പുരോഗതി അറിയിക്കണം എന്നും കോടതി നിര്ദേശിച്ചിട്ടുണ്ട്.
ഗവര്ണറുടെ ഭാഗത്ത് നിന്ന് സഹകരണമില്ലെന്നാണ് സംസ്ഥാനം കോടതിയെ നേരത്തെ അറിയിച്ചിരുന്നത്. സഹകരണത്തിനു വേണ്ടി പരമാവധി ശ്രമിച്ചെന്ന് സംസ്ഥാനം അറിയിച്ചു. എന്നാല് സംസ്ഥാന സര്ക്കാരിന്റെ ഭാഗത്തു നിന്നും ഒരു ശ്രമവും ഇല്ലെന്നാണ് അറ്റോര്ണി ജനറല് കോടതിയില് പറഞ്ഞത്. പിന്നാലെ വിസി നിയമനവുമായി ബന്ധപ്പെട്ട് സെര്ച്ച് കമ്മറ്റി രൂപീകരിക്കാന് നിര്ദേശിക്കുകയായിരുന്നു. ഇതിനായി കേരള സര്ക്കാരിനോടും ഗവര്ണറോടും പാനല് പട്ടിക തയ്യാറാക്കി സമര്പ്പിക്കാനും ഉത്തരവിട്ടിരുന്നു. സെര്ച്ച് കമ്മിറ്റിയിലേക്കുള്ള വിദഗ്ധരുടെ പട്ടിക സംസ്ഥാന സര്ക്കാരിന് ഗവര്ണര് ഇന്നലെയാണ് കൈമാറിയത്. നാലുപേരുടെ പട്ടികയാണ് സര്ക്കാര് അഭിഭാഷകന് ഗവര്ണര് കൈമാറിയത്. സര്ക്കാരും ഗവര്ണറും പട്ടിക പരസ്പരം കൈമാറണം എന്ന് സുപ്രീംകോടതിയുടെ നിര്ദേശം ഉണ്ടായിരുന്നു. ഇന്ന് കേസ് വീണ്ടും പരിഗണിച്ചതോടുകൂടി സര്ക്കാര് പട്ടിക സുപ്രീം കോടതിക്ക് കൈമാറുകയായിരുന്നു.
3dfdq3