ഹൈദരാബാദ്: പടിഞ്ഞാറന് മധ്യ ബംഗാള് ഉള്ക്കടലില് രൂപപ്പെട്ട് 'അതിശക്തമായ ചുഴലിക്കാറ്റായി' മാറിയ മൊന്ത ചുഴലിക്കാറ്റിന്റെ ഭീതിയിലാണ് ആന്ധ്രാപ്രദേശ് അടക്കം സംസ്ഥാനങ്ങള്. മണിക്കൂറില് 110 കിലോമീറ്റര് വേഗതയില് മൊന്ത ചുഴലിക്കാറ്റ് ആന്ധ്രാ പ്രദേശിന്റെ തീരങ്ങളിലേക്ക് അടുക്കുകയാണ്. ഇന്ന് വൈകുന്നേരമോ രാത്രിയിലോ ആന്ധ്രാപ്രദേശ് തീരത്തേക്ക് കടക്കാന് സാധ്യതയുണ്ടെന്നാണ് കേന്ദ്ര കാലാവസ്ഥാ വിഭാഗത്തിന്റെ മുന്നറിയിപ്പ്. ഈ സമയത്ത്, മണിക്കൂറില് 90-100 കിലോമീറ്റര് വരെ വേഗതയില് കാറ്റ് വീശാനും, ചില സമയങ്ങളില് 110 കിലോമീറ്റര് വരെ വേഗതയില് ശക്തമായ കാറ്റ് ഉണ്ടാകാനും സാധ്യതയുണ്ട്. തീരപ്രദേശങ്ങളില് നിന്നും ആളുകളെ ഒഴുപ്പിച്ചു. സംസ്ഥാനത്തെ 16 ജില്ലകളില് റെഡ് അലേര്ട്ട് പ്രഖ്യാപിച്ചിട്ടുണ്ട്.
ഒഡിഷ, ഛത്തീസ്ഗണ്ഡ്, തമിഴ്നാട്, പുതുച്ചേരി എന്നിവിടങ്ങളിലും ജാഗ്രതാ നിര്ദ്ദേശമുണ്ട്. വിവിധ സംസ്ഥാനങ്ങളിലായി അടുത്ത രണ്ട് ദിവസങ്ങളില് സര്വീസ് നടത്തേണ്ടിയിരുന്ന 100 ലേറെ ട്രെയിനുകള് റദ്ദാക്കി. പ്രധാനമന്ത്രി നരേന്ദ്രമോദി ആന്ധ്രാ മുഖ്യമന്ത്രി ചന്ദ്രബാബു നായിഡുവുമായി ഫോണില് ബന്ധപ്പെട്ട് സഹായങ്ങള് വാഗ്ധാനം ചെയ്തു. എന്ഡിആര്എഫ് സംഘം 5 സംസ്ഥാനങ്ങളിലായി 22 ടീമുകളെ വിന്യസിച്ചിട്ടുണ്ട്. ആന്ധ്രാപ്രദേശ്, ഒഡിഷ, പുതുച്ചേരി, തമിഴ്നാട് , ഛത്തീസ്ഗണ്ഡ് എന്നിവിടങ്ങളിലാണ് എന്ഡിആര്എഫ് സംഘത്തെ വിന്യസിച്ചത്. തീരപ്രദേശങ്ങള്ളവരോട് മാറിത്താമസിക്കാന് നിര്ദ്ദേശം നല്കി. ബീച്ചുകളും ടൂറിസ്റ്റ് പ്രദേശങ്ങളും അടച്ചു. ഇന്ന് രാവിലെ ആന്ധ്രാപ്രദേശിലും, ഒഡീഷ, തമിഴ്നാട് എന്നീ സംസ്ഥാനങ്ങളിലും മഴ ശക്തമായിരുന്നു. ഒഡീഷയില് 8 ജില്ലകളില് റെഡ് അലര്ട്ടാണ്.
തീരദേശ ആന്ധ്രാ റൂട്ടുകളിലെ 72 ട്രെയിന് സര്വീസുകള് റദ്ദാക്കി. യാത്രക്കാരുടെ സുരക്ഷ ഉറപ്പാക്കാനാണ് തീരുമാനമെന്ന് റെയില്വേ അറിയിച്ചു. വിജയവാഡ, രാജമുന്ഡ്രി, കാക്കിനട, വിശാഖപട്ടണം, ഭീമാവരം തുടങ്ങിയ പ്രധാന റൂട്ടുകളെ ഇത് സാരമായി ബാധിക്കും. ചുഴലിക്കാറ്റിന്റെ പശ്ചാത്തലത്തില് വിശാഖപട്ടണത്തിലൂടെ കടന്നുപോകേണ്ട ഒഡീഷയിലെ 32 ട്രെയിനുകള് റദ്ദാക്കി. നാളെ പുറപ്പെടാന് ഷെഡ്യൂള് ചെയ്തിട്ടുള്ള ലോക്കല് മെമുകളും മറ്റ് ട്രെയിനുകളും റദ്ദാക്കിയിട്ടുണ്ട്. ടാറ്റാനഗര്-എറണാകുളം എക്സ്പ്രസ് വഴിതിരിച്ചുവിട്ടിട്ടുണ്ട്. കൂടാതെ, ഭുവനേശ്വര്-ജഗ്ദല്പൂര് എക്സ്പ്രസ്, റൂര്ക്കേല-ജഗ്ദല്പൂര് എക്സ്പ്രസ് എന്നിവയുള്പ്പെടെ രണ്ട് ട്രെയിനുകള് ഷോര്ട്ട്-ടെര്മിനേറ്റ് ചെയ്തിട്ടുണ്ട്.
