കോഴിക്കോട്: മലയാളത്തിന്റെ മമ്മൂട്ടിയുടെ ആരോഗ്യ വാര്ത്തയില് സന്തോഷം പങ്കുവെച്ച് മലയാളക്കര. മമ്മുട്ടിക്ക് മുത്തം കൊടുക്കുന്ന പഴയൊരു ഫോട്ടോ പങ്കുവച്ചിരിക്കുകയാണ് മോഹന്ലാല്. മോഹന്ലാല് ഒന്നും എഴുതിയിട്ടില്ലെങ്കിലും മമ്മൂട്ടിയുടെ രോഗ വിമുക്തിയില് സന്തോഷം പ്രകടിപ്പിച്ചുള്ള പോസ്റ്റാണ് ഇത് എന്നാണ് വ്യക്തമാകുന്നത്. നിരവധി പേരാണ് മമ്മൂട്ടിക്ക് ആശംസകള് നേര്ന്ന് ഫോട്ടോയ്ക്ക് കമന്റുകള് എഴുതിയിട്ടുണ്ട്.
മമ്മൂട്ടി രോഗ വിമുക്തി നേടിയതിന്റെ സന്തോഷം പങ്കുവെച്ച് ജോണ് ബ്രിട്ടാസ് എംപിയും കുറിപ്പിട്ടിരുന്നു. നോവിന്റെ തീയില് മനം കരിയില്ല...പരീക്ഷണത്തിന്റെ വാള് വീശലുകളില് പതറുകയുമില്ല... വീശുന്ന കൊടുങ്കാറ്റുകള് ചിരികൊണ്ടു നേരിടും...പെയ്യുന്ന പേമാരികള് മുറിച്ചു നടക്കും... ആത്മവിശ്വാസത്തിന്റെപാറമേല് ഉറച്ചുനിന്നു തലയുയര്ത്തും... പ്രിയപ്പെട്ട മമ്മൂക്കാ .... ഇനി എത്രയോ കാതങ്ങള് ഞങ്ങളുടെ കരം പിടിച്ചു മുന്നേറാനുണ്ട് ... അഭിനയമികവിന്റെ എത്രയോ ഭാവതലങ്ങള്ക്കായി ഞങ്ങള് കാത്തിരിക്കുന്നു ..ഒത്തിരി സന്തോഷത്തോടെ ..നിറഞ്ഞ സ്നേഹത്തോടെ.. എന്നായിരുന്നു മമ്മൂട്ടിക്കൊപ്പമുള്ള ഫോട്ടോ പങ്കുവെച്ച് ജോണ് ബ്രിട്ടാസ് എഴുതിയത്. മാലാ പാര്വതിയും നേരത്തെ ഫേസ്ബുക്കില് കുപ്പ് എഴുതിയിരുന്നു. ''ഇതില് കൂടുതല് ഒരു നല്ല വര്ത്തമാനം ഇല്ല. മമ്മൂക്ക പൂര്ണ്ണ ആരോഗ്യം വീണ്ടെടുത്തിരിക്കുന്നു. ചികിത്സിച്ച ഡോക്ടര്മാര്ക്കും ശ്രുശൂഷിച്ച എല്ലാവവര്ക്കും, ആശുപത്രിയോടും കടപ്പാട്. സ്നേഹം. അതെ. രാജാവ് തിരിച്ചുവരുന്നു. സന്തോഷം, നന്ദി. പ്രാര്ഥനകള്ക്ക് ഫലം ഉണ്ടായിരിക്കുന്നു'', എന്നായിരുന്നു മാലാ പാര്വതിയുടെ കുറിപ്പ്.
മമ്മൂട്ടിയുടെ പേഴ്സണല് അസിസ്റ്റന്റും മേക്കപ്പ് മാനുമായ എസ് ജോര്ജും ഇക്കാര്യം അറിയിച്ച് ഫേസ്ബുക്കില് പോസ്റ്റ് ഇട്ടിട്ടുണ്ട്. ''സന്തോഷത്തില് നിറഞ്ഞ കണ്ണുകളോടെ കൈകൂപ്പി നിങ്ങളുടെ മുന്നില് ഞാന് നില്ക്കുന്നു. പ്രാര്ത്ഥിച്ചവര്ക്കും, കൂടെ നിന്നവര്ക്കും, ഒന്നുമുണ്ടാവില്ല എന്ന് പറഞ്ഞു ആശ്വസിപ്പിച്ചവര്ക്കും പറഞ്ഞാല് തീരാത്ത സ്നേഹത്തോടെ പ്രിയപ്പെട്ടവരെ...നന്ദി!'', എന്നാണ് ജോര്ജിന്റെ പോസ്റ്റ്. മമ്മൂട്ടിയുമായി അടുത്ത സൗഹൃദം സൂക്ഷിക്കുന്ന നടന് രമേശ് പിഷാരടിയും സന്തോഷം പങ്കുവച്ചിട്ടുണ്ട്. ''എല്ലാം ഓകെ ആണ്'' എന്നാണ് അദ്ദേഹത്തിന്റെ പോസ്റ്റ്.
