ദില്ലി: രണ്ട് ദിവസത്തെ ജിഎസ്ടി കൗണ്സില് യോഗത്തിന് ഇന്ന് ദില്ലിയില് തുടക്കം. ജിഎസ്ടി സ്ലാബുകള് പുതുക്കി നിശ്ചയിക്കും. നിലവിലെ 4 സ്ലാബുകള് രണ്ടാക്കി കുറയ്ക്കണമെന്നാണ് മന്ത്രിതല സമിതിയുടെ ശുപാര്ശ. സംസ്ഥാനങ്ങള്ക്ക് വരുമാന നഷ്ടമുണ്ടാകുമെന്ന ആശങ്കയിലാണ് പ്രതിപക്ഷ സംസ്ഥാനങ്ങള്.
ജിഎസ്ടി സ്ലാബുകള് പുതുക്കി നിശ്ചയിക്കാനുള്ള രണ്ട് ദിവസത്തെ ജിഎസ്ടി കൗണ്സില് യോ?ഗത്തിനാണ് ഇന്ന് ദില്ലിയില് തുടക്കമാവുക. നിരവധി ഉല്പന്നങ്ങളുടെ ജിഎസ്ടി കുറയ്ക്കുന്ന കാര്യം കൗണ്സില് ചര്ച്ച ചെയ്യും. ചെറിയ കാറുകള്, സിമന്റ്, തുകല് ഉല്പന്നങ്ങള്, പാക്കറ്റിലാക്കിയ ഭക്ഷണം, തുണിത്തരങ്ങള് എന്നിവയുടെ ജിഎസ്ടി കുറഞ്ഞേക്കും. മെഡിക്കല് ഇന്ഷുറന്സിനും ടേം ഇന്ഷുറന്സിനുമുള്ള ജിഎസ്ടി എടുത്തു കളയണമെന്ന നിര്ദേശവും കൗണ്സില് പരി?ഗണിച്ചേക്കും. കേരളം അടക്കമുള്ള പ്രതിപക്ഷ സംസ്ഥാനങ്ങള് വരുമാന നഷ്ടം നികത്താതെ തീരുമാനം എടുക്കരുതെന്ന് കൗണ്സില് യോ?ഗത്തില് വാദിക്കും.
ഇപ്പോള് നിലവിലുള്ള ജിഎസ്ടി നികുതിഘടന അടിമുടി പൊളിച്ച് 90% നിത്യോപയോഗ സാധനങ്ങള്ക്കും വില കുറയും വിധം സമഗ്ര പരിഷ്കരണം ഉണ്ടാകുമെന്നാണ് പ്രതീക്ഷ. സാധാരണക്കാരുടെ നികുതിഭാരം വന്തോതില് കുറയ്ക്കുന്ന ശുപാര്ശകള് യോഗം ചര്ച്ച ചെയ്ത് അന്തിമ തീരുമാനമെടുക്കും. കേന്ദ്ര ധനമന്ത്രി നിര്മല സീതാരാമന് നാളെ വൈകീട്ട് വാര്ത്താസമ്മേളനം നടത്തി യോഗ തീരുമാനങ്ങള് പ്രഖ്യാപിക്കാന് ആണ് സാധ്യത. ദീപാവലി വിപണിയില് തന്നെ വിലക്കുറവ് ഉണ്ടാകണം എന്നതിനാല് ഈ മാസം തന്നെ പുതിയ നികുതി സ്ലാബുകള് പ്രാബല്യത്തില് വരുത്തും. അതേസമയം, കേന്ദ്രത്തിലെ പ്രതിപക്ഷ കക്ഷികള് ഭരിക്കുന്ന കേരളവും ബംഗാളും കര്ണാടകയും തമിഴ്നാടുമുള്പ്പെടെ സംസ്ഥാനങ്ങള് പരിഷ്കരണത്തില് ആശങ്ക അറിയിച്ചിട്ടുണ്ട്. ഈ നികുതി പരിഷ്കരണത്തിലൂടെ സംസ്ഥാനങ്ങളുടെ വരുമാനം വീണ്ടും കുറയും എന്നാണ് ആശങ്ക.
