ദില്ലി: നിയമസഭ തെരഞ്ഞെടുപ്പിലെ ഉജ്ജ്വല വിജയത്തിന് പിന്നാലെ മുഖ്യമന്ത്രി ചര്ച്ചകളിലേക്ക് കടന്ന് കോണ്ഗ്രസ്. മുഖ്യമന്ത്രി ചര്ച്ചകള്ക്കായി ദില്ലിയില് നിര്ണ്ണായക യോഗം ഇന്ന് ചേരും. കോണ്ഗ്രസ് അധ്യക്ഷന് മല്ലികാര്ജുന് ഖാര്ഗെയുടെ വസതിയില് വൈകിട്ട് മൂന്ന് മണിക്കാണ് യോഗം ചേരുക. രാഹുല് ഗാന്ധിയും കേരളത്തില് നിന്നെത്തുന്ന കെ സി വേണുഗോപാലും യോഗത്തില് പങ്കെടുക്കും എന്നാണ് വിവരം.
മുഖ്യമന്ത്രിയെ തീരുമാനിക്കുന്നതിനായി എഐസിസി നേതാക്കള് ഇന്ന് കൂടിയാലോചനകള് നടത്തും. ഒരാഴ്ചക്കകം മുഖ്യമന്ത്രിയെ പ്രഖ്യാപനത്തിനാണ് ശ്രമം. അതേസയമം, മുഖ്യമന്ത്രി പദത്തിനായി പാര്ട്ടിയിലെ പ്രമുഖ നേതാക്കള്ക്കിടയില് നീക്കങ്ങള് ശക്തമായിട്ടുണ്ട്. എംഎല്എമാരില് ഭൂരിപക്ഷത്തിന്റെ പിന്തുണ തങ്ങള്ക്കുണ്ടെന്നാണ് കെസി പക്ഷം അവകാശപ്പെടുന്നത്. കൂടുതല് എംപിമാരും മുതിര്ന്ന നേതാക്കളും ഒപ്പമുണ്ടാകുമെന്നും ഇവര് പ്രതീക്ഷിക്കുന്നു. എംഎല്എമാരുടെ എണ്ണം മാത്രമല്ല പരിഗണിക്കേണ്ടതെന്നാണ് സതീശന് വിഭാഗത്തിന്റെ നിലപാട്. ഘടകകക്ഷികളെ കൂടെനിര്ത്തിക്കൊണ്ടുള്ള നീക്കങ്ങള്ക്കാണ് സതീശന് പ്രാധാന്യം നല്കുന്നത്. പദവി ലഭിച്ചില്ലെങ്കില് അദ്ദേഹം കടുത്ത നിലപാടുകളിലേക്ക് നീങ്ങിയേക്കുമെന്ന സൂചനയുണ്ട്. ഇതിനെല്ലാം പുറമെ, സീനിയോറിറ്റിക്കാണ് മുഖ്യമന്ത്രി പദത്തില് മുന്ഗണന നല്കേണ്ടതെന്ന് ചെന്നിത്തല വിഭാഗം വാദിക്കുന്നത്.
