തിരുവനന്തപുരം: കേരളത്തില് കനത്ത ചൂട് തുടരുന്ന സാഹചര്യത്തില് 12 ജില്ലകളില് കേന്ദ്ര കാലാവസ്ഥാ വകുപ്പ് യെല്ലോ അലര്ട്ട് പ്രഖ്യാപിച്ചു. കൊല്ലം, കോട്ടയം, പാലക്കാട് ജില്ലകളിലാണ് ചൂട് ഏറ്റവും ഉയര്ന്ന നിലയില് തുടരുന്നത്. ഈ ജില്ലകളില് താപനില 38°C വരെ ഉയരാന് സാധ്യതയുണ്ടെന്നാണ് അറിയിപ്പ്. പത്തനംതിട്ട, ആലപ്പുഴ, എറണാകുളം, തൃശൂര്, കോഴിക്കോട്, കണ്ണൂര് ജില്ലകളില് 37°C വരെയും, തിരുവനന്തപുരം, മലപ്പുറം, കാസര്കോട് ജില്ലകളില് 36°C വരെയും ചൂട് വര്ദ്ധിക്കുമെന്നാണ് മുന്നറിയിപ്പ്. സാധാരണ ലഭിക്കേണ്ടതിനേക്കാള് രണ്ട് മുതല് മൂന്ന് ഡിഗ്രി സെല്ഷ്യസ് വരെ താപനില ഉയരാന് സാധ്യതയുള്ളതിനാല് പകല് 11 മണി മുതല് 3 മണി വരെ നേരിട്ട് വെയില് ഏല്ക്കുന്നത് ഒഴിവാക്കണമെന്നും ജാഗ്രത പാലിക്കണമെന്നും ദുരന്തനിവാരണ അതോറിറ്റി നിര്ദ്ദേശിച്ചു. സംസ്ഥാനത്ത് പൊതുവെ ചൂട് വര്ധിച്ചു വരുന്ന സാഹചര്യത്തില് പൊതുജനങ്ങള്ക്കായി സംസ്ഥാന ദുരന്ത നിവാരണ അതോറിറ്റി ജാഗ്രത നിര്ദേശങ്ങളും പുറത്തിറക്കി.
